GOGA.TV
youtube
3
  • რომან კაკულია მიიჩნევს, რომ ამერიკელი სენატორები არაინფორმირებულ დასკვნას აკეთებენ

    ამერიკელი სენატორებისა და კონგრესმენების მიერ სახელმწიფო მდივნისთვის გაგზავნილ წერილს, რომელშიც საუბარია იმაზე, რომ საქართველოში ამერიკული ბიზნესისა და ეროვნული უსაფრთხოების ინტერესები ზიანდება და ერთ-ერთი მთავარი თემა კომპანია "ფრონტერაა", მმართველ გუნდში ეხმაურებიან.

    პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე რომან კაკულია მიიჩნევს, რომ ამერიკელი სენატორები არაინფორმირებულ დასკვნას აკეთებენ. რომან კაკულია კრიტიკულ განცხადებებს პოლიტიკურ პროცესებს უკავშირებს და აცხადებს, რომ გარკვეული ჯგუფები საქართველოში ისეთ ადამიანებს ეძებენ, რომლებიც იქნებიან მათი ინტერესების გამტარებელი, ყოველგვარი კონტექსტებისა და ზედმეტი შეკითხვების გარეშე, ამ კონტექსტში ის ევროპარლამენტარ ანდრიუს კუბილიუსსა და ამერიკელ სენატორებსაც ახსენებს:

    "ფრონტერამ" წააგო არბიტრაჟი და ყველა ის შეფასება, რომელიც მასთან დაკავშირებით კეთდებოდა, არ არის სწორი, იმიტომ, რომ მე ვიცნობ ამ კომპანიის საქმიანობას წლების განმავლობაში. ძალიან ბევრი ნეგატიური კონტექსტი შეიძლება იყოს მასთან დაკავშირებული და ეს არბიტრაჟში წაგებითაც დადასტურდა. მათი ლობისტობა არ არის ინფორმირებული ხალხის ლობისტობა და მე დარწმუნებული ვარ, ადრე თუ გვიან ეს ყველაფერი გაირკვევა და ყველაფერს თავისი სახელი დაერქმევა.

    ასეთი ტენდენციური შეფასებები, როგორც ჩანს გაგრძელდება, კონტექსტიდან ამოგლეჯილი სხვადასხვა ფაქტების შეფასებები, ამიტომ სიღრმისეული ანალიზი სჭირდება ამ ყველაფერს. ძალიან სიღრმისეულ პოლიტიკურ პროცესებთან გვაქვს ჩვენ საქმე, აქ ლაპარაკი იმაზე კი აღარ არის, რომ ვიღაც უკეთესად მუშაობს და ვიღაც ნაკლებ ეფექტურია. უბრალოდ არიან პოლიტიკური ჯგუფები, რომლებიც აქ ეძებენ ისეთ ადამიანებს, რომლებიც იქნებიან მათი ინტერესების გამტარებელი, ყოველგვარი კონტექსტებისა და ზედმეტი შეკითხვების გარეშე. ჩვენ არც კუბილიუსის მსგავსი ევროპა გვინდა, სიმართლე რომ გითხრათ და არც ისეთი სენატორების ამერიკა, რომლებიც "ფრონტერას" თემას ასე ვითომ ნეიტრალურად აფასებენ. საზოგადოებამ თუ არ დასვა დიაგნოზი საბოლოო ჯამში, ძალიან გვიანაა სამწუხაროდ, იმდენად ღრმადაა ეს ყველაფერი შესული," - განაცხადა რომან კაკულიამ.

    შეგახსენებთ, ამერიკელი სენატორები და კონგრესმენები შეერთებული შტატების სახელმწიფო მდივანს მაიკ პომპეოს და ფინანსთა მინისტრს სტივენ მნუჩინს წერილით მიმართავენ. მთავარი თემა "ფრონტერა" და საქართველოში ამერიკული კომპანიების საქმიანობაა. "ქვეყანაში ზიანდება ამერიკული ბიზნესისა და ეროვნული უსაფრთხოების ინტერესები. მმართველობის პრობლემებმა პირდაპირ გამოუთხარა ძირი ამერიკული კომპანიების შესაძლებლობას, იმუშაონ და გააღრმაონ ჩვენი ურთიერთობები საქართველოსთან" - ნათქვამია წერილში, რომელსაც ხელს აწერენ ტედ კრუზი და ჯონ კორნინი წარმომადგენელთა პალატის წევრებთან, ჯოდი არინგტონთან და მარკვეინ მალინთან ერთად.
    197 ნახვა
    16-05-2020, 09:17