X
GOGA.TV
13
"რაც ხელისუფლებაში რუსი ოლიგარქი ბიძინა ივანიშვილი მოვიდა, ქვეყნის პროგრესმა უკან დაიხია" - ამერიკელი კონგრესმენები
  • "რაც ხელისუფლებაში რუსი ოლიგარქი ბიძინა ივანიშვილი მოვიდა, ქვეყნის პროგრესმა უკან დაიხია" - ამერიკელი კონგრესმენები

    მორიგი კრიტიკული წერილი ამერიკელი კონგრესმენებისგან.ევროპული საქართველოს წევრი გიორგი კანდელაკი 6 პოლიტიკოსის წერილს აქვეყნებს. დოკუმენტში, რომელსაც ხელს აწერენ, ჯოდი არინგტონი, მარკ მალინი, ბილ ფლორსი, ვილ ჰარდი, ბრაიან ბაბინი და რენდი ვებერი, საუბარია საქართველოში დემოკრატიის კრიზისსა და ოლიგარქიულ მმართველობაზე.

    ამ წერილის თანახმად, ამერიკელები ფიქრობენ, რომ მმართველობას მფარველობას რუს ოლიგარქად მოხსენიებული ბიძინა ივანიშვილი უწევს. კონგრესმენები აშშ-ის სახელმწიფო მდივანს საქართველოს ხელისუფლებასთან ურთიერთობის დროს რამდენიმე საკითხის გათვალისწინებას სთხოვენ.

    6 კონგრესმენის ავტორობით წერილი 27 ივლისით არის დათარიღებული. დოკუმენტში ნათქვამია, რომ ბიძინა ივანიშვილი საქართველოდან ამერიკული ბიზნესის განდევნას ცდილობს, რაც კერძო სექტორში რუსეთიდან, ჩინეთიდან და ირანიდან ინვესტიციების გასაზრდელად კეთდება.

    "გწერთ, რათა კიდევ ერთხელ გამოვხატოთ შეშფოთება საქართველოში დემოკრატიული მმართველობის გაუარესებასა და პოტენციურ კორუფციასთან დაკავშირებით.
    როგორც იცით, საქართველომ 1991 წელს დამოუკიდებლობის აღდგენის შემდეგ დიდი ნაბიჯები გადადგა ეკონომიკისა და გეოპოლიტიკური უსაფრთხოების მიმართულებით ურთიერთობების ტრანსფორმაციის კუთხით, რათა გლობალური სავაჭრო პარტნიორებისთვის უზრუნველყო ბაზარზე წვდომა, თავდაცვითი ურთიერთობები, ასევე თავისუფალი და სამართლიანი არჩევნები. თუმცა, რაც 2012 წელს ხელისუფლებაში რუსი ოლიგარქი ბიძინა ივანიშვილი და მისი პარტია "ქართული ოცნება" მოვიდა, ქვეყნის პროგრესმა უკან დაიხია.

    თქვენს კოლეგებთან შერილ ფერნანდესთან და აარონ რუპერტთან საუბრის შემდეგ, თავს დარწმუნებულად ვგრძნობთ, რომ სახელმწიფო დეპარტამენტი ყველაფერს აკეთებს, რათა მონიტორინგი გაუწიოს კერძოს სექტორის საინვესტიციო გარემოს გაუარესებას, განსაკუთრებით აშშ-ის კომპანიებისთვის. ასევე საქართველოს მთავრობის მიერ ვალდებულებების შესრულებას დემოკრატიული რეფორმების გაგრძელებისა და ნატოში გაწევრიანების სწრაფვის მიმართულებით. რადგანაც, სამომავლოდ შეხვედრებს გამართავთ საქართველოს ოფიციალურ პირებთან, განსაკუთრებით საქართველოს პრემიერ-მინისტრ გახარიასთან, გთხოვთ, რომ მხედველობაში იქონიოთ ჩვენი შეშფოთება რიგ საკითხებთან დაკავშირებით:

    1. საქართველოს ამჟამინდელი მთავრობა, რომელსაც პარტია “ქართული ოცნება" ხელმძღვანელობს, მანიპულირებულია რუსი ოლიგარქის ბიძინა ივანიშვილის მიერ, რომელიც ცდილობს განდევნოს ამერიკული ბიზნესები, რომლებთაც ათწლეულებია საქართველოს და ამერიკის ეკონომიკებში თავიანთი წვლილი შეაქვთ. ეს კერძო სექტორში რუსეთიდან, ჩინეთიდან და ირანიდან ინვესტიციების გაზრდის სასარგებლოდ კეთდება.

    2. საქართველოში შავი ზღვის პორტებთან დაკავშირებული აქტივობები საფრთხეს უქმნის ამერიკის ეროვნული უსაფრთხოების მნიშვნელოვან ინტერესებს, მათ შორის:
    ა. შავი ზღვის პორტის ინვესტიციებიდან/ მფლობელობიდან იმ ამერიკული კომპანიების განზრახ გაყვანით, რომელთა მიზანი საქართველოს რუსული და ჩინური გავლენებისგან იზოლირება იყო.
    ბ. ნაკლოვანება ირანისა და რუსეთის წინააღმდეგ დაწესებული ამერიკული სანქციების აღსრულების კუთხით, განსაკუთრებით და კონკრეტულად პორტთან დაკავშირებული აქტივობებისა და სხვა კერძო სექტორის ინვესტიციების კონტექსტში.

    3. ფაქტი, რომ საქართველოს პარლამენტს ჯერ კიდევ არ მიუღია საჭირო საარჩევნო რეფორმის კანონი, რომელიც გადამწყვეტია 2020 წლის შემოდგომის საპარლამენტო არჩევნების გამჭვირვალობისა და სამართლიანობისათვის.

    ჩვენ ვაფასებთ თქვენს ყურადღებას ამ საკითხთან დაკავშირებით და გთხოვთ, რომ თქვენთან და თქვენს გუნდთან ერთად განვიხილოთ ქმედებები, რომლებიც ჩვენი ურთიერთობის განსამტკიცებლად და საქართველოს ანგარიშვალდებულობის კუთხით გადაიდგმება,"- ნათქვამია კონგრესმენების წერილში.
    132 ნახვა
    30-07-2020, 08:44