GOGA.TV
შვიდი პარტიის წინადადებების პაკეტში ორი ჩვენთვის კატეგორიულად მიუღებელია
  • შვიდი პარტიის წინადადებების პაკეტში ორი ჩვენთვის კატეგორიულად მიუღებელია

    "პატრიოტთა ალიანსის" ერთ-ერთი ლიდერი, ირმა ინაშვილი სოციალურ ქსელში განმარტავს, თუ რატომ არ ესწრებოდნენ ოპოზიციური პარტიებისა და დიპლომატების ბოლო შეხვედრას.

    ინაშვილის განმრტებით, შვიდი პარტიის წინადადებების პაკეტში ორი მათთვის კატეგორიულად მიუღებელია, ერთს კი აღიქვამენ, როგორც ხელისუფლებასთან გარიგების ფორმულას.

    ინაშვილი აღნიშნავს, რომ მისი პარტია "პატრიოტთა ალიანსი" მოქმედებს დამოუკიდებლად.

    "დღეს ყველა ტელეარხი და ჟურნალისტი მეკითხება, – რატომ არ ვიყავით ელჩებთან შეხვედრაზე. გპასუხობთ ყველას:

    1. ჩვენ არასდროს არ ვიყავით არანაირ გაერთიანებულ ოპოზიციაში. არასდროს არ ვართ იქ, სადაც სააკაშვილი და ბოკერიაა. ჩვენ დამოუკიდებლად ვმოქმედებთ. ელჩებს ჩვენ ვხვდებით ან მარტო ან ე.წ. რაუნდებზე, სადაც არის ხელისუფლებაც და საერთოდ სულყველა.
    2. რამდენადაც მე ვიცი (შეიძლება, სწორად არც ვიცი), ეს იყო 7 პარტიის შეხვედრა. და მე კვლავ ვამბობ: ჩვენ ვმოქმედებთ მარტო, ცალკე და დამოუკიდებლად!
    3. ჩვენი მოთხოვნები იგივეა, რაც იყო. პირველი – ახალი არჩევნები გაზაფხულზე! მეორე – გაზაფხულზევე ჩატარდეს ელექტრონული არჩევნები. მესამე – გაზაფხულზევე არჩევნებში მონაწილეობა გახდეს სავალდებულო ყველასათვის.

    მეოთხე – გაზაფხულზევე ადმინისტრაციული რესურსის გამოყენებისთვის ან გაყალბებისთვის სისხლის სამართლის სასჯელი გახდეს 12 წლიდან ზემოთ.
    მეხუთე – საარჩევნო გარემოს ანუ ცესკოს და ა.შ. შეცვლა.

    რაც შეეხება იმ 7 პარტიის პაკეტს, ბატონმა ბადრი ჯაფარიძემ გადმომიგზავნა ეს მასალა. იქ 2 პუნქტია, რაც ჩვენთვის კატეგორიულად მიუღებელია, მაგრამ დღეს არაფერს ვიტყვი ამაზე, ვინაიდან თავად წინადადების პაკეტის ავტორები არ ასაჯაროვებენ მათი პაკეტის შინაარსს, ველოდებით რა მესამე რაუნდს. ამ პუნქტთაგან ერთ-ერთს მე და ჩვენი გუნდი პირდაპირ აღვიქვამთ, როგორც ხელისუფლებასთან გარიგების ფორმულას," - წერს ირმა ინაშვილი სოციალურ ქსელში.

    ცნობისთვის, ოპოზიციამ ელჩებს მათი მოთხოვნები წერილობით გადასცა და "ქართული ოცნებისგანაც" წერილობით პასუხებს ელოდება.
    159 ნახვა
    5-12-2020, 10:49