7
შუმახერის ცოლის განცხადება
  • შუმახერის ცოლის განცხადება

    ზუსტად 46 დღე გავიდა მას შემდეგ, რაც მიხაელ შუმახერი კომაშია. 45 წლის შუმის ოჯახი ოპტიმისტურადაა განწყობილი. შუმის მეუღლემ, კორინა შუმახერმა გუშინ საღამოს განცხადება გაავრცელა - ეს გახლავთ პირველი ოფიციალური კომენტარი ბოლო ორი კვირის განმავლობაში.

    Auto Bild”მიხაელის ოჯახი მადლობას უხდის ყველას, ვინც მისი მდგომარეობით შეწუხებულია. თქვენი თანადგომა ოჯახს ძალიან ეხმარება და ჩვენ დარწმუნებულები ვართ, რომ ეხმარება თვითონ მიხაელსაც, რომელიც ჯერ კიდევ კომაშია. კომიდან გამოყვანის პროცესი კვლავ მიმდინარეობს, თუმცა ჩვენ ვიცით, რომ ეს პროცესი შეიძლება დიდხანს გაგრძელდეს,” - ნათქვამია შუმახერის ოჯახის განცხადებაში.

    შუმი თხილამურებით სრიალისას 29 დეკემბერს, მერიბელში (საფრანგეთი) დაეცა, თავი ქვას დაარტყა და მას შემდეგ ტვინის ორი ოპერაცია გაუკეთეს. მიხაელი გრენობლის კლინიკაში წევს.

    შუმახერის ოჯახის განცხადებაში ასევე ვკითხულობთ: ”ისევე, როგორც ასეთი შემთხვევების უმეტესობაში, ერთმანეთისგან ყველა დღე განსხვავდება. ოჯახი გთხოვთ ყველას, გაგებით მოეკიდოთ იმას, რომ სამედიცინო დეტალებზე არ ვსაუბრობთ. ჩვენ გვჯერა, რომ მიხაელი გამოჯანმრთელდება და სრულ ნდობას ვუცხადებთ ექიმებს, მედდებსა და მომვლელებს. მთავარი ის კი არ არის, რამდენად სწრაფად გამოჯანმრთელდება შუმი, არამედ ის, რომ პროცესი სტაბილურად მიმდინარეობდეს და ვითარება კონტროლირებადი იყოს. გპირდებით, რომ მნიშვნელოვანი სიახლეების შესახებ საზოგადოებას მაშინვე ვაცნობებთ.”

    რამდენიმე დღის წინ გერმანული გაზეთი ”ბილდი” სანდო წყაროზე დაყრდნობით წერდა, რომ შუმის ფილტვების ანთებაც ჰქონდა. ახალი ინფორმაციით, ამ ავადმყოფობის გამო მოსალოდნელმა საფრთხემ უკვე გადაიარა - მიხაელმა ფილტვების ანთება ფაქტობრივად დაამარცხა.

    იმედია, მალე სხვა სასიამოვნო ცნობებიც გავრცელდება.

    1 059 ნახვა
    16-02-2014, 06:28